Yevlax rayonunun Xaldan qəsəbəsində yol-nəqliyyat hadisəsi baş verib.

Xeber-ps.com xəbər verir ki, bununla bağlı videogörüntü sosial şəbəkədə yayımlanıb.

Baş vermiş hadisə ilə bağlı Baş Dövlət Yol Polis İdarəsinə (BDYP) sorğu ünvanladıq.

İdarənin inspektoru, polis leytenantı Elvin Hacıyev Xeber-ps.com-ın sorğusuna cavab olaraq faktı təsdiqləyib.

O qeyd edib ki, sözügedən yol-nəqliyyat hadisəsi avqustun 18-i saat 13:30-da Xaldan-Zaqatala-Gürcüstan sərhədi yolunun ikinci kilometrliyində qeydə alınıb.

"Hadisənin baş verməsinə səbəb "Renault" markalı yükdaşıma fəaliyyəti ilə məşğul olan EX-100-Lİ Gürcüstan dövlət nömrə nişanlı nəqliyyat vasitəsinin sürücüsü, Gürcüstan vətəndaşı Rövşən Mübariz oğlu İsayevin əks istiqamətli hərəkət zolağına çıxaraq qarşıdan gələn 66-BJ-455 dövlət nömrə nişanlı "QAZel" markalı nəqliyyat vasitəsi ilə toqquşması olub. Hadisə nəticəsində xəsarət alan olmayıb, Gürcüstan vətəndaşı olan sürücüyə protokol tərtib olunub", - deyə açıqlamada bildirilir.

Əzizə İsmayılova