Azərbaycan Ali Məhkəməsinin yaradılmasından 101 il ötür.

Xeber-ps.com xatırladır ki, Ali Məhkəmənin yaradılması haqqında 1923-cü il fevral ayının 13-də qərar qəbul edilib və qurum mart ayının 1-dən fəaliyyətə başlayıb.

Azərbaycan SSR Mərkəzi İcraiyyə Komitəsinin (MİK) 1922-ci il 9 dekabrda keçirilən 2-ci sessiyasında “Azərbaycan SSR-də məhkəmə quruluşu haqqında Əsasnamə” qəbul olunub. Azərbaycan SSR MİK Əsasnamənin qüvvəyə minməsi barədə 1923-cü il 13 fevral tarixli 8 saylı qərar qəbul edib.

Bu qərarda Azərbaycan Ali Məhkəməsinin 1923-cü il martın 1-dən fəaliyyətə başlaması müəyyənləşib. Azərbaycan Respublikası Ali Məhkəməsinin yaranması günü məhz fevralın 13-ü ilə bağlıdır.

Qeyd edək ki, Azərbaycan Respublikası Konstitusiyasının 131-ci maddəsinə uyğun olaraq, Ali Məhkəmə ümumi və ixtisaslaşdırılmış məhkəmələrin icraatına aid olan mülki (o cümlədən inzibati və iqtisadi mübahisələrə dair), cinayət işləri və digər işlər üzrə ali məhkəmə orqanıdır.

Ali Məhkəmə kassasiya instansiyası məhkəməsi kimi qanunla müəyyən edilmiş prosessual qaydada ədalət mühakiməsini həyata keçirir.

Ali Məhkəmə paytaxt Bakıda təşkil edilib, onun yurisdiksiyası Azərbaycan Respublikasının bütün ərazisinə şamil edilir.