"Neftçi"nin futbolçusu Qara Qarayev əvəzedici heyətə göndərilməsinə münasibət bildirib.

Xeber-ps.com xəbər verir ki, bu barədə 31 yaşlı yarımmüdafiəçi özü sosial şəbəkə hesabında yazıb.

Azərbaycan millisinin sabiq üzvü bu məsələdə ona dəstək olan hər kəsə öz təşəkkürünü bildirib:

"Əziz azarkeşlər, kütləvi informasiya vasitələri və futbol icması, dəstəyinizə və xoş sözlərinizə görə hər kəsə təşəkkür edirəm. Futboldakı karyeram həmişə sevdiyim idmana olan hörmət və fədakarlıqla bağlı olub. Mən Azərbaycan futboluna canımı və ürəyimi vermişəm və illərdir verdiyim töhfənin sual altına alınması məni ruhdan salmır. Əksinə, öz yoluma və sizlərə sadiq qalıram, komandamı dəstəkləməyə və bacardığım qədər töhfə verməyə davam edəcəyəm. Ümid edirəm ki, qərar qəbul edənlər təcrübənin dəyərini və uzun müddət xidmət edən oyunçuların layiq olduqları hörməti dərk edəcəklər. Futbola olan bağlılığım dəyişməzdir və üzərimə düşən hər rolda ən yaxşı şəkildə çalışacağam. Hər bir çətinliyin yeni bir böyümə və müsbət təsir imkanı gətirdiyinə inanıram", - paylaşımda qeyd olunub.

Qeyd edək ki, "Neftçi"nin baş məşqçisi Roman Qriqorçuq Q.Qarayevi əsas heyətdə görmək istəmədiyi üçün əvəzedici heyətə göndərib.