Aralıq dənizi ilə Qırmızı dənizi birləşdirən Süveyş kanalından əldə olunan gəlirlər bu ilin ilk 11 günündə illik müqayisədə 40% azalıb.

Bunu kanal idarəsinin rəhbəri Usamə Rabia bildirib.

Onun sözlərinə görə, azalmaya əlverişsiz hava şəraiti səbəb olub.

Rabia qeyd olunan müddətdə kanalla tranzit daşımaların 30% azaldığını, oradan keçən gəmilərin sayının isə 544-ə düşdüyünü açıqlayıb.

Xatırladaq ki, 2023-cü ilin sonunda Yəmənin “Ənsar Allah” hərəkatının Qırmızı dənizdəki gəmilərə hücumları nəticəsində Süveyş kanalı ilə yük daşımaları 28% azalıb. Onların gəmilərə hücumları İsraillə HƏMAS hərəkatı arasında gedən müharibə fonunda daha tez-tez baş verir.

Yanvarın 12-də ABŞ və Böyük Britaniya Yəməndəki husilərin mövqelərinə zərbələr endirib.

Mənbə: kommersant.ru