Salyanda baş verən yol-nəqliyyat hadisəsi zamanı bir ailənin 6 üzvü xəsarət alıb.

"Report"un Aran bürosunun məlumatına görə, hadisə Ələt-Astara magistralının rayon ərazisindən keçən hissəsində qeydə alınıb.

Belə ki, Bakı istiqamətində hərəkətdə olan "Opel" markalı avtomobil qəfil idarəetmədən çıxaraq aşıb.

Qəza nəticəsində Biləsuvar rayon sakinləri, 2000-ci il təvəllüdlü Bənövşə Yaşar qızı Qurbanova, 1970-ci il təvəllüdlü Nəzakət İdris qızı Eynullayeva, 1997-ci il təvəllüdlü Gülxanım Ayaz qızı Qurbanova, 2021-ci il təvəllüdlü Gülsüm Ələkbər qızı Qurbanova, 2018-ci il təvəllüdlü Ələmdar Ələkbər oğlu Qurbanov və 1995-ci il təvəllüdlü Ələkbər Rəfail oğlu Qurbanov xəsarətlər alıblar.

Xəsarət alanlar Salyan Mərkəzi Rayon Xəstəxanasına çatdırılıblar.

Faktla bağlı araşdırma aparılır.